以前講起中國風﹐大家印象應該唔係《九月九的酒》﹐就係《縴夫的愛》﹐都係老土到無朋友...

直到我早排同老表去皇崗間小肥羊打邊爐﹐再聽大陸嘅中國風﹐真係進步到不得了...

呢首《姑娘我愛你》﹐由索朗札西主唱﹐佢係正宗蒙古人﹐成首歌唱腔亦係蒙古民謠唱腔﹐真係普通人都唱唔到。

最緊要係﹐索朗札西衣著真係幾型仔﹐而且個樣有少少似我老表﹐阿木。

聽講呢首歌﹐而家係大陸好紅﹐用蒙古民謠唱腔唱流行曲﹐真係好少見。奇就奇在﹐呢首歌雖然蒙古味非常重﹐但一D都唔老土...

我絕對相信﹐無論係香港定台灣﹐都好有一個歌手﹐可以唱到呢種唱腔。

另一首﹐相信有留意大陸《超級女聲》節目的話﹐都應該會知道。

呢首就係周筆暢舊歌《誰動了我的琴弦》

旋律優雅﹐周筆暢唱腔有D中性(其實個樣都好中性)﹐非常似周杰倫D中國風歌曲...

聽到呢首歌﹐好自然諗起《髮如雪》﹑《青花瓷》...

我覺得好好聽﹐雖然我到而家都唔知呢首歌想講D乜野

我只係覺得﹐「誰讓你動了我的琴弦﹐這次一遍又一遍﹐喚醒了人影孤單嵌入夜」﹐好容易令人想入非非。

講起中國風﹐唔可以唔提鳳凰傳奇嘅《自由飛翔》呢首歌

雖然都唔係新歌啦﹐曾幾何時次次上親大陸﹐都會係disco聽到呢首騎呢歌

你話好唔好聽呢﹖好聽又唔覺﹐話唔好聽﹐又唔係...總之好騎呢...

女腔唱聲明顯係舊派唱腔﹐男聲則係rap﹐搞到不倫不類。

另一首中國風潮爆作品﹐都可以話係夾子道嘅《絕戀帝女花》啦~~

呢首歌﹐真係潮到無朋友﹐先來〈香夭〉頭幾句歌詞﹐然後就rap﹐之後又整段R&B…

論唱腔﹐感覺有D動力火車﹐rap果段則太沉聲﹐尤其係最後果段﹐一面唱香夭一面rap﹐就真係唔認真聽﹐都聽唔到佢rap緊D乜囉...

之但係論創意﹐呢首真係無得頂啦﹖又香夭又rap又R&B炒埋一碟﹐而且聽落又幾舒服...

至少無鳳凰傳奇D歌果種騎呢感覺先啦﹖